2019 жылдың 7 маусымында Түркістан өңіріне арнайы іс-сапармен келген Қазақстан Республикасының Мемлекеттік қызмет істері және сыбайлас жемқорлыққа қарсы іс — қимыл Агенттігінің Төрағасы Алик Жатқамбайұлы «Түркістан — Адалдық алаңы» Жобалық кеңсесіне табан тіреп, академиялық адалдыққа бастайтын кеңсенің бүгінгі жұмысымен танысты.
Ең алдымен «Түркістан — Адалдық алаңы» Жобалық кеңсесінің жетекшісі Асыл Алдаберген жобалық кеңсе жұмысының негізгі бағыттарын баяндап, онда қызмет ететін жас мамандармен таныстырды.
Шара барысында Жобалық кеңсе жетекшісінің орынбасары Ақтөре Талғатұлы сөз алып, Агенттік Төрағасына сенім атмосферасын құруға сеп болатын тың идеяларын ұсынды.
Соның бірі, көне шаһар Отырар жеріндегі Арыстан баб кесенесі мен түркі әлеміне таныс Қожа Ахмет Ясауи кесенесіне кіру құнын адалдық жәшіктері арқылы төлеу тәсілі болды.
Ұсынысты ұйып тыңдаған Алик Жатқамбайұлы Ақтөре Талғатұлы тарапынан ұсынылған идеяны тиімді бастама деп танып, алдағы уақытта ҚР Мәдениет Министрлігіне ұсынуға болатындығын жеткізді.
Жиын барысында Агенттік төрағасы Алик Шпекбаев сыбайлас жемқорлыққа қарсы мәдениетті қалыптастыруда «Адалдық алаңының» мүмкіншілігі жоғары екендігін атап өтті.
Сондай-ақ, жобалық кеңседе қызмет ететін жас мамандардың біліктілігіне оң баға беріп, егемен елімізге еселі еңбек ететіндіктеріне сенім білдірді.
Шарада «Түркістан — Адалдық алаңы» Жобалық кеңсесінің Түркістаноблысына қарасты барлық қала, аудан, ауыл округтеріндегі жүйелі жұмысы арнайы бейнеролик арқылы көрсетіліп, Жобалық кеңсенің бүгінгі қарқыны сөз болды.
Бүгінде жобалық кеңсе өңіріміздегі сыбайлас жемқорлық алғышарттары көптеп кездесетін «білім», «денсаулық сақтау», «халықты әлеуметтік қолдау», «жер қатынастары», «мемлекеттік кірістер органдары», «сот және құқық қорғау органдары» салаларына мониторинг және сыртқы талдау жұмыстарын жүргізіп, сыбайлас жемқорлықты болдырмау мақсатында ілкімді істер атқаруда.
Айта кетсек, адалдыққа жол бастайтын жобалық кеңсе облыс орталығында 2018 жылдың 12 желтоқсанынан бастап жұмыс жасап келеді.
Түркістан облысы